CEBU – Gihimug-aatan ni Father Alladin Luzon, OSA sa Basilica Minore del Sto Niño nga gawas sa pagsangyaw sa pulong sa Ginoo, lakip usab sa kinahanglang ihatag sa mga debotong Katoliko ang pagtabang sa mga apektado sa krisis nga gi-atubang sa kalibutan gumikan sa Coronavirus Disease 2019.
Subay niini, gibutyag ni Father Luzon nga adunay gigahin nga luna ang Basilica Minore del Sto Niño nga himuong alternative quarantine facility nga aprubado og nasuta usab sa Department of Health (DoH).
Adunay gigahin nga lugar nga magsilbing food center diin nagpakaon ang taga simbahan sa mga “homeless” o ang walay mga panimalay nga nagpondo gawas sa simbahan.
Nakig-alayon na usab matod pa ang simbahan sa mga mo-bolontaryo sa paghimo og improvised Personal Protective Equipment (PPE) nga aduna’y supervision sa mga health experts.
Subay sa gi-atubang nga krisis sa kalibutan, gihangyo ni Father Luzon ang mga debotong Katoliko nga unta dili himu-ong rason ang palisiya sa “social distancing” aron dili makatabang sa mga nagkinahanglan.
Matod ni Luzon nga kinahanglang mamentenar gihapon ang mga preventive measures lakip na ang social distancing atol sa paghatag og serbisyo sa mga apektado sa pandemic nga sakit. Gihimug-atan ni Luzon nga dili makaya sa mga pari og madre kung wala ang tabang sa mga deboto.
