LAPU-LAPU, CITY-Plano sa kagamhanan sa dakbayan sa Lapu-Lapu nga i- expropriate ang lote diin ang mga nasunogan sa Sitio Sta. Maria, Barangay Pusok nagpuyo.
Kini ang planu ni Mayor Junard Ahong Chan nga mopatuman og socialized housing project sa maong lugar, aron mahatagan og seguridad ang mga nasunogan ug aron dili sila mabakwit.
Dugang pa, nga sa pagkakaron, ang lote gipanag-iya sa Philippine Export Zone Authority (PEZA) ug usa ka pribadong indibidwal.
Matod sa mayor nga mangayo usab siya og tabang sa National Housing Authority (NHA) aron mapundohan ang socialized housing project.
Ang sunog sa Sitio Sta. Maria niadtong Disyembre 12, 2023, mipabakwit og kapin sa 8,000 ka mga indibidwal, diin ang uban kanila kasamtangang gibakwit ubos sa Marcelo Fernan Bridge.
Gawas niini, si Chan niingon nga ipatuman usab niya ang reblocking sa maong lugar, aron sila makahimo og karsada aron dili makasinati og kalisdanan ang mga bombero sa panahon nga adunay mga insidente sa sunog sa nahisgutang lugar.
Kung kahinumduman nga gikanselar ang Christmas party sa City Hall gumikan sa dakong pag-ulbo sa sunog nga miigo sa maong dapit apan, gahapong adlawa gisaulog nila Pasko sa Pusok Elementary School diin gipangulohan ni Mayor Ahong Chan uban sila Congresswoman Cindi Chan, Vice Mayor Celsi Sitoy ug mga konsehal, anaa usab ang presenya sa Kapitan sa Pusok nga si Kap Ranie Godinez-Emperio.
