Gipahibalo sa Korte Suprema nga ang mga aplikante nga mapakyas sa pagsumiter sa Ombudsman clearance mahimong matangtang o dili maapil sa shortlist sa Judicial and Bar Council.
Matod sa tigpamaba sa Korte Suprema nga si Atty. Camille Sue Mae Ting, nga si Department of Justice Secretary Jesus Crispin Remulla ug Philippine Charity Sweepstakes Office Chairperson Felix Reyes mahimong dili maapil sa mga nominado.
Kini tungod kay wala pa makasumiter og clearance gikan sa Ombudsman ang mga opisyal sa ilang aplikasyon sa nasangpit nga posisyon.
Apan bisan pa niini, nipatim-aw gihapon sila sa public interview nga gipahigayon sa Judicial and Bar Council sa Korte Suprema.
Gipasabot ni Atyy. Ting nga kini tungod kay gihatagan lang ang mga aplikante hangtod sa adlaw sa final deliberation aron makasumiter sa gikinahanglang clearance .
Bisan wala niya hisgoti ang eksaktong petsa, lauman nga mahitabo kini sa
umaabot nga mga semana.
Dugang pagpasabot sa tigpamaba sa Korte Suprema nga ang pagsumiter og clearance sa Ombudsman usa sa mga rekisitos nga ma-nominate sa shortlist sa Judicial and Bar Council.
Matod niya importante kini tungod kay obligasyon ug responsibilidad sa Ombudsman ang pag-imbestigar ilabina ang mga opisyal sa gobyerno.
Matod pa niya nga ang ‘clearance’ gikan sa Ombudsman mao ang pagpakita nga adunay ‘probity’ o good moral standing ang tawo nga gitudlo sa maong posisyon.
Sa laing bahin, gipaambit ni Department of Justice Secretary Jesus Crispin Remulla nga moduso siya og mosyon aron masulbad ang reklamo nga giatubang sa Ombudsman.
Ingon man nga gusto niya nga masulbad kini sa labing daling panahon uban sa iyang aplikasyon alang sa posisyon sa Ombudsman.
