Giaprobahan sa South Korea ang balaod nga nagdili sa paggamit sa mobile phones ug ubang digital gadgets sa mga classrooms sa tibuok nasod sugod sa Marso sunod tuig.
Ang balaod nagtumong sa pagsulbad sa nagkagrabeng epekto sa sobra nga paggamit sa social media sa mga batan-on.
Gisuportahan kini sa duha ka partido sa parlamento, diin ang balaod gipaila taliwala sa mga kabalaka bahin sa pagkaadik sa social media sa mga batan-on.
Matod ni Cho Jung-hun, usa ka magbabalaod sa oposisyon ug kaubang author sa balaodnon, daghang mga batan-on sa nasud ang naggugol og oras gamit ang mga platform sa social media, nga giingong nagpahinabog mga problema sa ilang kahimsog ug ilang pagtuon.
Basi sa datos gikan sa Ministeryo sa Edukasyon, 37% sa mga estudyante sa tungatunga ug hayskul miingon nga ang social media makaapekto sa ilang adlaw-adlaw nga kinabuhi, samtang 22% kanila mobati nga nabalaka pag-ayo kung dili sila makagamit sa social media.
Samtang daghan na nga mga tunghaan sa nasud ang aduna nay kaugalingong polisiya bahin sa paggamit sa cellphone, ang bag-ong balaod naglatid sa opisyal nga pagpatuman niini sa tibuok nasod.
Ang paggamit sa mga digital device tugutan gihapon alang sa mga estudyante nga adunay mga kakulangan o alang sa mga katuyoan sa edukasyon lamang.
Samtang, daghang grupo sa adbokasiya sa mga kabatan-onan ang misupak sa balaod, nga nag-ingon nga kini makalapas sa tawhanong katungod sa mga bata.
