Nakadiskobre ang mga siyentista gikan sa Korea Advanced Institute of Science and Technology (KAIST), South Korea, og bag-ong paagi aron sa pagbalik sa mga colon cancer cells sa normal nga porma, imbes nga gub-on kini.
Ang maong pagkadiskobre gipangunahan ni Propesor Kwang-Hyun Cho, diin ilang gamiton ang cutting-edge nga digital twin technology sa pagtambal sa cancer.
Diin ang modernong teknolohiya kay makasundog ug makaanalisa sa mga interactions sa gene, makaila sa molecular switch nga magpahinabog mga kausaban.
Ang mga tradisyunal nga pagtambal karon sa kanser kasagarang nagpunting sa pagpatay sa mga selula sa kanser, nga sagad hinungdan sa grabe nga mga epekto ug nagdugang sa risgo sa pagbalik sa sakit.
Apan niining nadiskobrehan sa usa ka grupo sa mga siyentista sa SoKor, gilauman nga ang bag-ong pamaagi makahatag og mas luwas ug epektibong paagi pinaagi sa pag-usab sa ideya gikan sa pagguba sa mga selula sa kanser ngadto sa pag-ayo niini.
Diin ang normal nga mga selyula ug mga selula sa kanser maghiusa sa wala pa kini mausab ngadto sa mga selula sa kanser sa panahon sa tumorigenesis – usa ka proseso sa pagporma sa tumor nga kasagaran tungod sa dili makontrol nga pagdaghan sa mga selula sa lawas sa tawo.
Niini nga proseso, ang normal nga mga selula makahimo og mga kausaban sa ilang mga genetic nga materyales, nga maoy hinungdan sa ilang pagtubo ug pagdaghan nga dili normal.
Kung ang dugang nga mga pagtuon nagpamatuod sa positibo nga mga sangputanan sa pagtuon, kini nga bag-ong pamaagi mahimo’g magbag-o sa natad sa pagtambal sa kanser.
Tungod kay matod pa sa mga taho gikan sa World Health Organization (WHO). Ang kanser mao ang ikaduhang nag-unang hinungdan sa kamatayon sa tawo sa tibuok kalibotan.
Sa pagkakaron, walay tambal nga hingpit nga makaayo sa tanang matang sa kanser. Bisan pa, adunay lainlaing mga pamaagi aron mapapas kini sama sa Chemotherapy, Radiotherapy, Surgery ug uban pa.
Ang pagkadiskobre sa mga bag-ong pamaagi sa pagtambal sa kanser naghatag bag-ong paglaom sa mga pasyente sa kanser.
