Nagpadayon ang pagsusi sa Binaliw Landfill samtang ang Kagamhanan sa Dakbayan sa Sugbo nagpadayon sa pag-validate sa mga kinahanglanon sa kalikupan ug teknikal nga gipahamtang sa dili pa ang operasyon sa dumping mahimong ipadayon sa pasilidad.
Matud ni Cebu City Mayor Nestor Archival, nga gipadala na ang mga sakop sa bag-ong natukod nga Solid Waste Crisis Task Force sa dakbayan aron sa pagsusi sa landfill ug pagsuta kon ang gibuksan nga bahin nakatuman ba sa mga kondisyon nga gitakda sa Department of Environment and Natural Resources (DENR) 7.
Kini gitukod ubos sa executive order nga nagdeklarar og state of solid waste management emergency sa dakbayan sa Sugbo, gilangkuban sa mga representante gikan sa City Environment and Natural Resources Office, Disaster Risk Reduction and Management Office, City Legal Office, City Health Office ug ubang technical personnel nga gitahasan sa pag-validate sa kaluwasan ug operational nga kaandam sa pasilidad.
Sigon ni Archival nga ang team mosusi sa mga rekisitos nga gipahamtang sa DENR, mosusi sa mga dokumento nga gisumite sa landfill operator ug mosusi kon ang lugar nga giablihan og balik bulag ba sa bahin nga naapektuhan sa makamatay nga Ene.
Gipasabot usab niini nga gusto sa Cebu City Government nga masiguro nga luwas ug haom sa operasyon ang giablihang balik nga lugar sa dili pa mohimo og pinal nga desisyon.
Ang pagpadayon sa paghakot sa mga basura ngadto sa Aloguinsan makadugang pag-ayo sa galastohan sa Siyudad, diin ang matag adlaw nga paghakot ug mga gasto sa paglabay gibanabana nga moabut sa P2 milyones.
Gidepensahan usab sa mayor ang temporaryo nga paggamit sa South Road Properties (SRP) isip usa ka waste holding area, tungod kay ang Siyudad karon adunay limitado nga mga kapilian sa paglabay.
Gisubli sa mayor nga ang dakbayan sa Sugbo nag-una sa paglainlain sa mga basura isip kabahin sa dugay na nga direksyon sa pagdumala sa solid waste.
