CENTRAL VISAYAS-Malampuson ang pagpahigayon sa Solidarity Pact Signing alang sa 2025 National ug Local Elections, ingon man ang Bangsamoro Autonomous Region in Muslim Mindanao Parliamentary Election nga gipangulohan sa kadagkuan sa Commission on Elections (COMELEC) Region 7 ug Police Regional Office-Central Visayas.
Diin ang kalihokan nagsimbolo sa gipaambit nga pasalig aron makab-ot ang malinawon, luwas, tukma, gawasnon, ug limpyo nga piniliay sa Mayo 2025.
Pinaagi sa pagpasiugda sa kalinaw ug kahapsay, pagtuboy sa lagda sa balaod, ug ang pagpalambo sa civic nga responsibilidad sa pagpanalipod sa katungod sa pagboto sa matag Pilipino.
Sa solidarity pledge board diin gipangpirmahan na nila ni Atty. Francisco Pobe, ang COMELEC-7 Director, Police Brigadier General Redrico Maranan ang regional director sa PRO 7, ingon man ang mga presenya sa mga director sa DILG 7, DEPED 7, PCG 7, AFP, DPWH, DENR ug uban pang ahensya sa gobyerno inubanan sa mga pangu sa multipliers.
Kini nga lakang aron sa pagpalig-on sa pagkab-ot sa limpyo, malinawon ug hapsay nga piniliay.
Karong magsugod na ang campaign period alang sa mga magpapili susamang misaad ang mga directors sa nagkandaiyang ahensya sa gobyerno nga buhaton ang ilang tagsa-tagsa ka mga tahas aron masiguro nga malakangkat gayud ang hapsay nga piniliay.
Gani, sa gipaambit ni Police Brigadier General Redrico Maranan nga mas gipahugtan pa ang pagpatuman sa seguridad sa nagkandaiyang lugar sa rehiyon ug mibahad sa mga pulis sa Central Visayas nga dili mamahimong adunay dapigan nga kandidato ug kon gani masakpan ug adunay ebidensya hayan nga mataktak kini sa katungdanan.
Sa pikas bahin, gibutyag usab ni Maranan, nga adunay 33 ka mga lugar sa tibuok rehiyon nga giila nga election areas of concern.
Taliwala niini, usa ra ka lugar ang gipaubos sa red category diin kining espesipikong dapit nga nakit-ang adunay grabe nga panag-indigay sa politika, kasaysayan sa kapintasan, mga hulga sa mga komunistang teroristang grupo, ug ang presensya sa mga pribadong armadong grupo ug mga criminal gangs.
Samtang, sunod-sunod na nga gipangtang-tang ang mga campaign materials gawas sa mga common poster areas ning magsugod na ang campaign period sa senatorial ug party list groups.
Atol sa pakighinabi sa Bombo Radyo Cebu kang Director Pobe gipaambit niini nga malampuson ang unang adlaw sa operasyon diin ang mga nag-unang lugar nga gihawanan nga nagtumong nga makita sa katawhan ug aron makahibalo usab ang mga magpapili nga ang ilang mga propaganda materials kay adunay gitagana nga lugar nga mamahimo sila ngadto nga magpapilit.
