CEBU CITY — Gilauman sa usa ka political analyst gikan sa Ateneo de Davao University ang simple apan kinasingkasing nga ikalimang State of the Nation Address (SONA) ni Presidente Rodrigo Duterte.
Atol sa tulumanong Good Morning Philippines sa Bombo Radyo, nagkanayon si Professor Ryan Maboloc nga angayang atangan sa katawhan ang i-report ni Duterte atubangan sa mga Pilipino ang tanyag nga COVID-19 Recovery Plan sa nasud.
Kini aron nga mahatagan og paglaum ang matag Pilipino bisan pa man og wala pay kasiguraduhan kung kanus-a mahuman ang nasinating pandemya nga miresulta sa pagkahagba sa ekonomiya.
Matud usab ni Maboloc nga dili pa matuman ang uban pang mga saad sa kasamtangang administrasyon gumikan kay mas hatagan og pagtagad ang pagbangon sa nasud human sa krisis nga dala sa pandemya.
Napaglantawan sa political analyst nga adunay buot ipasabot ang matag pulong nga pagabatbaton ni Duterte sanglit nagagikan kini sa iyang kasingkasing.
Misalig usab kini nga magpabiling sinsero ang kagamhanan sa nasud ning nasinating hagit, bisan pa man sa wala’g tuo nga gi-atubang nga pagsaway gikan sa kritiko ug sa katawhan.
Nanghinaut si Maboloc nga pinaagi sa SONA ni Duterte ubos sa “new normal,” masinati sa mga motambong usa mga makakita ang “sense of solidarity.” /gn
