Andam ang South Korea nga makigsulti sa North Korea aron mapakunhod ang tensyon ug malikayan ang pag-uswag sa panagbangi tali sa duha ka nasud.
Miingon si South Korean President Lee Jae Myung nga importante ang pagpalig-on sa usa ka “multi-layered security system” aron mapugngan ang pag-escalate sa tensyon sa Korean Peninsula.
Matud niya, ang pakighinabi tali sa duha ka Korea makatabang usab sa pagpakunhod sa tensyon sa demilitarized zone (DMZ), ang buffer zone nga nagbulag sa North ug South Korea.
Nagtanyag usab si Lee og praktikal nga mga pamaagi aron matubag ang isyu sa nuclear ambition sa North Korea.
Samtang, nagpadayon ang North Korea sa pagpahigayon og ballistic missile tests, nga nagpahinabog kabalaka sa South Korea ug sa mga silingang nasud, lakip ang Japan.
Ang armadong panagbangi tali sa North ug South Korea mihunong pinaagi sa armistice nga gipirmahan niadtong 1953. Apan, wala pa kini gisundan og pormal nga kasabutan sa kalinaw, busa teknikal nga nagpabilin ang duha ka nasud sa kahimtang sa gubat.
Sulod sa mga dekada, nagpabilin usab ang tensyon sa DMZ, diin ang North ug South Korea kanunay nga nag-akusar sa usag usa sa mga insidente ug pagpasamot sa sitwasyon.
