Alerto na karon ang South Korea sa higayon nga ang North Korea molabay ug magpadala pag-usab og balloon nga puno sa basura, toilet paper, ug hugaw sa mananap ngadto sa South Korean territory.
Kini ang gipahibawo sa militar sa South Korea tungod kay giingong adunay posibilidad nga mahitabo na usab kini niadtong Domingo isip tubag sa pagpalupad sa mga propaganda balloon sa mga aktibista sa South Korea.
Ang nasangpit nga balloon nga gipalupad sa aktibistang “Fighters for North Korea” nga adunay sulod nga 200,000 ka Pyongyang leaflets nga pulos anti-Kim Jong Un, 100 ka radyo, ug USB flash drives nga adunay sinultihan ni South Korean President Yoon Suk Yeol ug bisan sa lain-laing mga kpop music.
Gibuhat kini sa mga aktibista isip balos tungod kay kung mahinumduman, kaniadtong miaging semana ang North Korea naglabay sa labing menos 600 ka mga balon nga puno sa basura ug pipila ka wala mailhi nga mga butang.
Matod sa militar sa South Korea, ila kining gikonsiderar nga low class action apan bisan pa niini alang sa South Korea activist leader nga si Jang Se-yul dili mohunong sa ilang kampanya bisan pa kon magpadala usab si Kim Jong Un sa maong mga basura.
