CEBU CITY — Lauman ang bug-at nga dagan sa trapiko sa South Road Properties alang sa ipahigayong 30th Southeast Asian Games Ceremonial Torch Relay sa Cebu City karong hapon.
Matud sa operations head sa Cebu City Transportation Office (CCTO) nga si Andres Bayarcal nga sirad-an ang southbound lane gikan sa F. Vestil Street padung sa Cebu South Coastal Road bridge sa dakbayan sa Talisay sugod karong alas-2 sa hapon hangtud na sa alas-7:30 sa gabii.
Kini gumikan kay modagan ang halos 6,000 ka mga runners sa maong dalan diin magsugod ang torch run sa gun time nga alas-5 sa hapon.
Dugang pa ni Bayarcal nga himoong two-way ang northbound lane sa SRP alang sa mga mo-agi nga sakyanan atol sa road closure.
Naka-standby usab ang mga sakop sa CCTO alang sa maong event aron magiyahan ang mga mo-agi nga motorista.
Panguluhan sa maong torch relay ang 10 ka mga torchbearers sama nilang Presidential Assistant to the Visayas Secretary Michael Dino, Cebu City Mayor Edgardo Labella, ug mga Cebuano athletes.
Pagkahuman sa torch run, sundan kini sa usa ka lighting ceremony nga ipahigayon sa usa ka dakong mall sa SRP.
