Spartan trail sa dakbayan sa Sugbo, gisirad-an tungod sa taho bahin sa vandalism

Gisirad-an ang Spartan trail nga nahimutang sa dakbayan sa Sugbo human sa taho sa vandalism o pagpangdaot sa mga kahoy ug ‘gabions’.

Matud sa Department of Environment and Natural Resources (DENR 7) nga nagpahigayon na og imbestigasyon ang mga awtoridad ug nag-andam alang sa rehabilitasyon sa naasoy nga lugar.

Sumala sa DENR 7, ang pasiunang mga resulta sa imbestigasyon nagpakita nga adunay nahitabong pagpangdaot sa mga kahoy ug ‘gabions’ nga gipahimutang sa Central Cebu Protected Landscape-Protected Area Management Office (CCPL-Pamo) subay sa maong agianan.

Ang mga kahoy ug gabion giingong gidaot gamit ang spray paint, usa ka substansiya nga posibleng makaapekto sa kalidad sa tubig ug sa marine ecosystem sulod sa protektadong lugar.