Masaligon si House Speaker Martin Romualdez nga tukion sa Senado ang pag-amendar sa economic provisions sa 1987 Constitution.
Gipahibalo kini ni Romualdez sa pagtudlo ni Senador Chiz Escudero isip bag-ong Senate President.
Matod ni Romualdez, iyang itugyan sa Senado ang dangatan sa economic chacha tungod kay gisagop na sa Kamara ang Resolution of Both Houses o RBH7.
Dugang pa ni Romualdez, kusganong gituohan niini nga tukion sa Senado ang gisugyot nga mga reporma ug pag-amendar sa konstitusyon tungod kay ang makabenepisyo niini mao ang mga katagilungsod.
Nanghinaot si Romualdez nga magpadayon ang maayong relasyon sa duha ka balay sa Kongreso bisan pa man sa kausaban sa liderato sa Senado.
Asoy pa niini nga nasayod si Escudero sa mga priority bills nga kinahanglang aksiyonan ilabina kon magsugod na ang ikatulong regular session sa 19th Congress.
