Giduso na usab ni Speaker Ferdinand Martin Romualdez ang usa ka importanteng balaudnon nga nagtinguha sa paghatag og binuwan nga hazard pay sa mga piskal.
Kini mao ang House Bill (HB) No. 2664 nga nagsugyot og P5,000 nga binuwan nga hazard pay alang sa mga prosecutors nga nagdumala sa mga delikadong kaso sama sa inquest hearings, preliminary investigations, ug prosecutions nga naglambigit sa terorismo, illegal nga drugas, plunder ug corruption, money laundering ug uban pang delikadong criminal offenses.
Gipadayag ni Speaker Romualdez ang kamahinungdanon sa paghatag og hazard pay sa mga piskal tungod kay nag-atubang sila sa lainlaing mga hulga.
Ang mga co-author sa maong balaodnon mao sila si Tingog Party-list Reps Yedda Marie K. Romualdez, Andrew Julian K. Romualdez ug Jude Acidre, diin gitumbok sa mga magbabalaod nga ang mga prosecutors sagad gipuntirya sa mga mamumuhat og daotan.
Naglangkob usab kini sa mga prosecutor nga gi-assign sa mga lugar nga panagbangi, mga lugar nga adunay katalagman, ug mga isolated assignments.
Giklaro usab sa maong balaudnon nga tax-exempt ang gisugyot nga hazard pay.
Ang mga pundo kuhaon gikan sa DOJ ug sa katapusan ihatag pinaagi sa tinuig nga budget nga anaa sa General Appropriations Act (GAA).
Busa, masaligon si Romualdez nga ang maong sugyot suportahan sa mga sakop sa 20th Congress.
