CENTRAL VISAYAS-Giila na sa kapulisan ang ‘Mastermind’ sa pagpatay kang Negros Oriental Governor Roel Degamo ug walo pa.
Kini ang pamahayag ni Police Lieutenant Colonel Gerard Ace Pelare, tigpamaba sa Special Investigation Task Group Degamo, SITG-Degamo nga ila na karon ang identity sa gitumbok nga utok sa pag-atake nga mipatay kang Degamo.
Hinuon, matud pa niini nga dili na niini ipagawas ang pangalan samtang naghulat pa sa pagkompleto sa imbestigasyon.
Dugang ni Pelare nga base sa ilang imbestigasyon, ang pagplano ug pagsubay sa disenyo sa pag-atake nagsugod niadtong Disyembre 2022.
Ilaha usab nga gitan-aw ang posibilidad nga adunay inside job o konspirasyon sa pag-atake
Samtang sa pikas bahin, duha ka state witness nga anaa na karon sa kustodiya sa National Bureau of Investigation (NBI) nitumbok kang Congressman Arnie Teves nga maoy utok sa pagpatay kang Negros Oriental Governor Roel Degamo.
