CEBU CITY-Giangkon ni Police Supt. Virgilio Bayon-on sa Special Investigation Task Group-Maya (SITG) nga hangtud karon wala pa silay nakuhang lead sa anggulo sa pag-ambush ni Daanbantayan Mayor Vicente Loot niadtong Mayo 13 sa buntag.
Matud ni Supt. Bayon-on nga padayon pa ghihapon ang ilang imbestigasyon ug ang pagpangita sa mga account sa witnesses nga mamahimong makatabang sa imbestigasyon. Giingon usab niini nga tanang anggulo ang gitan-wa nila karon partikular na ang politika ug involvement niini sa iligal nga drogas.
Tungod niini,subli nga mi-apelar ang SITG sa mga posibleng makatabang sa ilang imbestigasyon ug kung mahimo makigcoordinate sa mga pulis para mapadali ang pagresolbar sa kaso.
Samtang nasayran nga tungod sa nahitabo sa Mayor sa lungsod sa Daanbantayan, limitado na lang mga lakaw niini apan padayon gihapon kini nga nagserbisyo isip mayor sa ilang lungsod.
Mahinumduman nga gibanhigan ang Mayor buntag niadtong Mayo 13 sa dihang panaog na unta kini sa sakayan sa may port sa Brgy. Maya sa naasoy nga lungsod.
Wala napuruhan ang Mayor apan naangol ang duha niya ka driver, yaya sa iyang mga apo nga kauban niya niadtong higayona ug ang usa ka porter nga naigo sa bala nga karon puro luwas na.
