Gipahibalo sa kagamhanang lalawigan sa Sugbo nga gipatuman sa tibuok probinsya lakip na ang mga Highly Urbanized ug Component Cities sa Mandaue, Lapu-Lapu, Danao, Toledo, ug Cebu City ang Special Non-Working Holiday karong adlawa sa Miyerkules, Agosto 6, 2025 isip pagsaulog sa ika-456 nga Founding Anniversary sa lalawigan.
Kini nga kamanduan kay nahisubay sa gilatid nga balaudnon nga Republic Act No. 8952 o ang pag-deklarar sa matag Agosto 6 nga Special Non-Working Holiday sa tibuok Sugbo nga gilagdaan niadtong Agosto 31, 2000 ni kanhi Presidente Joseph “Erap” Estrada.
Sa habig sa mga trabahante, ang special non-working holidays kasagaran ubos sa prinsipyo nga “no work, no pay”, gawas nalang kon adunay polisiya o collective bargaining agreement (CBA) sa kompanya nga naghatag ug laing kasabutan.
Kung ang usa ka empleyado nagtrabaho sa usa ka special non-working holiday, sila adunay katungod sa usa ka premium nga suweldo nga 30% sa ilang sukaranan nga sweldo alang sa una nga walo ka oras nga pagtrabaho gawas pa sa kwentada sa overtime pay.
Karong tuiga nagtimaan sa ika-456 nga Anibersaryo sa Pagkatukod sa Probinsiya sa Sugbo, natukod ubos sa kolonyal nga rehimeng Espanyol niadtong 1569. Mao usab kini ang labing unang selebrasyon ubos sa termino ni Provincial Governor Pamela “Pam” Baricuatro.
