Hugot na ang pagpangandam sa National Shrine of St. Joseph sa dakbayan sa Mandaue para sa umaabot nga Traslacion o ang pagbisita sa imahen ni Sr. Sto. Niño de Cebu nga kabahin sa kalihukan sa Fiesta Señor 2026.
Kini ang gipamahayag ni Fr. Ian Fel Balankig, nga Parochial Vicar sa maong simbahan sa eksklusibong pakighinabi niini sa Bombo Radyo Cebu News Team.
Sumala pa ni Fr. Balankig nga usa sa ilang espesyal nga gipangandaman karon sa maong simbahan kay ang mas taas nga pagpabilin sa imahen ni Sr. Sto. Niño sa dakbayan sa Mandaue aron mas mahimamat sa mga debotong Mandauehanon ang Balaang Batang Hesus.
Mahitabo ang Traslacion 2026 inig Enero 15 diin sa pag-abot sa imahen ni Sr. Sto. Niño sa simbahan sa dakbayan sa Mandaue kay magpahigayon kini sila og misa sa alas 9 sa buntag.
Human sa maong misa, adunay veneration og pahalok sa imahen ang ipahigayon nga mulanat hangtod sa Enero 16 sa alas 4 sa kadlawn nga madungan sa Panagtagbo Festival sa syudad.
Gikatakda sab nga mag-overnight stay ang imahen ni Sr. Sto. Niño sa Virgen de la Regla National Shrine sa dakbayan sa Lapu-Lapu isip preparasyon sa musunod nga Fluvial Procession sa Mactan Channel inig Enero 17.
