Gideklarar sa Kagamhanang Dakbayan sa Sugbo ang “State of Calamity” sa intero syudad nunot sa pagkabalda sa koleksyon sa basura human sa nahitabong Enero 8 nga Binaliw landfill landslide.
Sumala pa sa pakighinabi sa mga tigbalita ni Cebu City Councilor Dave Tumulak, kinsa ang Chairman sa Cebu City Disaster Risk Reduction and Management Council (CCDRRMC) nga gikonsiderar na nilang ang maong deklarasyon tungod sa nabaldang operasyon sa pagpangolekta sa basura ug mismong ang insidente niadtong Enero 8 sa landfill landslide.
Gani mipaabot ang konsehal sa pasalamat sa Barangay Polog sa lungsod sa Consolacion sa pagdawat sa kasabutang temporaryong maglabay ang dakbayan og nakolektang basura niini sa hamubo nga panahon – sulod sa 30 ka adlaw, samtang gilatid pa ang permanenting solusyon sa giabagang problema sa syudad sa waste management nga nakahatag og hulga sa pampublikong panglawas.
Gani niadtong Enero 12 kay nag-isyu na ang Department of Environment and Natural Resources – Central Visayas (DENR-7) og cease-and-desist order batok sa Prime Integrated Waste Solutions, Inc. nga tigdumala sa maong pasilidad.
Ang sugyot sa deklarasyon sa state of calamity kay bunga sa joint resolution nga giduso nila ni Konsehal Tumulak ug Cebu City Councilor – North District Joel Garganera atol sa online regular session sa Cebu City Council niadtong Martes, Enero 13, 2026 sa ilang gihulagway nga “grave and tragic incident” nga miresulta sa kamatayon, pagkaangol, pagkawala ug seryosong hulga sa pampublikong panglawas ug sa kinaiyahan.
Nunot niining deklarasyon kay nagtugot kini sa pagpagawas sa P30-milyones gikan sa calamity fund sa kagamhanang dakbayan diin gawas sa Binaliw kay maapuran sab ang mga biktima sa sunog sa Barnagay Tejero sa nakalabayng semana.
Samtang sa pikas bahin sa susamang sesyon sa konseho, si Konsehal Garganera miduso sa corollary motion nga nagdeklarar sa Enero 16, 2026 isip “Day of Mourning” (Adlaw sa Pagbangutan) isip paghandum sa pagkawala sa mga biktima sa makalilisang nga panghitabo.
