LAPU-LAPU CITY-Gipusil patay ang usa ka street food vendor sa wala pa mailhing gunman, Huwebes sa gabii, o pipila lang ka oras sa wala pa siya mag edad ug 31-anyos.
Giila ang street food vendor nga si Clifford John Cavan Lumba kinsa magsaulog unta sa iyang ika-31 nga adlawng natawhan gahapong adlawa, Septiyembre 22,2023.
Ang pinakasakit pa, gipatay si Lumba atubangan sa iyang inahan samtang nag-atiman sa ilang sidewalk stall sa usa ka busy nga dalan sa Barangay Basak Iba mga alas 8 sa gabii sa Huwebes.
Nagkanayun si Police Captain Abraham Igot, hepe sa Marigondon Police Station, nga ilang gitan-aw nga personnel grudge ang posibleng motibo sa pagpatay kang Lumba.
Dugang pa, nga matud sa mga saksi, nagsul-ob og itom nga jacket ug helmet ang suspek.
Gikatahong giduol sa suspek si Lumba ug ang inahan niini nga nag-atiman sa ilang tindahan ug mikuhag kalibre .45 nga pistola ug gipusil si Lumba kausa.
Matod ni Igot, nakadagan si Lumba pipila ka metros gikan sa ilang stall, apan gigukod siya sa suspek ug gipaulanan og laing buto nga maoy hinungdan sa iyang kamatayon.
Dugang pa, nga nakaangkon kini og samad pinusilan sa iyang liog ug bukton.
Sa pikas bahin, wala maunsa ang inahan ni Lumba, apan nagpabilin kining state of shock tungod sa iyang nasaksihan.
Ang inahan ni Lumba nangayo og igong panahon aron maproseso ang kamatayon sa iyang anak sa dili pa siya makigsulti sa kapolisan, Apan nisaad siya nga mokooperar sa ilang nagpadayong imbestigasyon.
Matod ni Igot nga personal grudge ang ilang gitan-aw karon nga posibleng motibo sa kamatayon ni Lumba human sila makadawat og impormasyon bahin sa una nilang away sa laing tawo.
