CEBU – Gibutyag ni Dr. Mary Jean Loreche, ang tigpamaba sa Visayas Vaccination Center (VVOC) ug chief pathologist sa Department of Health (DOH) REgion 7 nga kung ugaling motaas ang kompyansa sa katawhan mamahimong matinuod ang gikabutyag sa mga eksperto nga posible pang mosaka ang kaso sa Covid-19 dili lamang sa dakbayan sa Sugbo kundili lakip tibuok nasod tungod sa Omicron subvariant.
Gitino ni Loreche nga kung ang katawhan dili hugot nga sundon ang minimum health protocols sama sa insaktong pagsul-ob sa facemask ug uban pa posible nga makasinati og laing surge sa makamatayng sakit ang dakbayan.
Gi-awhag niini ang publiko sa subling pagpabakuna gumikan mao kini ang panahon nga kinahanglang i-boost sa katawhan ang ilahang resistensya o preteksyon batok sa mga subvariant sa Covid-19.
Sa kasamtangan, wala pa mosaka ang kaso sa tibuok rehiyon 7 gumikan gamay naman lang magpatesting ingon man kasagaran karon modiritso na og isolate sa ilahang kaugalingon kung makasinati og simtomas sa naasoyng sakit.
