Nagkaguliyang ang gatosan ka mga indibidwal sa pipila ka bahin sa Sugbo human nga nitay-og ang kusog nga 6.9 magnitude nga linog pasado alas 9:59 kagabii, Setyembre 30, 2025.
Sa natalang kadaot, nahugno ang Archdiocesan Shrine of Santa Rosa de Lima sa Daanbantayan, Cebu, ug nabungkag ang pipila ka bahin sa maong simbahan.
Samtang sa Bogo, kung diin mao ang epicenter sa maong linog, usa ka sikat nga fastfood chain ang nakasinati og grabe nga kadaot sa pustora niini, ug dili na gyud luwas nga sudlan sa mga tao, ug usab dagkong liki sa mga kadalanan ang nasugatan usab sa mga motorista.
Sa laing bahin, nagpahimutang usab sa gawas nga bahin ang mga pasyente ug pipila katawhan sa hospital sa Cebu City Medical Center ning dakbayan sa Sugbo human sa makalilisang nga linog, diin adunay kompirmadong 3 ang natalang naangol.
Niluwat usab og pamahayag ang pangu sa Sugbo nga si Mayor Nestor Archival nga kung mahimo, magpabiling kalmado sa maong sitwasyon bisan paman sa mga gipaabot nga aftershocks.
Sa pagkakaron, wala pay verified nga impormasyon og kung aduna bay kompirmadong patay nga natala sa maong linog.
Apan, nagdelikarar na nga walay klase karong adlawa Oktobre 1 ang mga tunghaan sa Dakbayan sa Sugbo, sa Mandaue ug uban pa.
Sa laing bahin, nanawagan usab si Cebu Capitol Health Consultant Elisse Nicole Catalan, ang anak ni Gobernador Pam Baricuatro, nga ang probinsiya sa Sugbo nangitag mga medical volunteers aron madugangan ang mga tawo, ilabina sa amihanang mga lungsod nga naapektuhan sa 6.9 linog, samtan ang Gobernadora, padayun nga nakig-alayong sa nagkadaiyang buhatan aron sa paghatud sa dinaliang hinabang.
Sa laing bahin, alas 2:00 sa kaadlawon karong Oktubre 1, gikompirmar sa dakbayan sa Bogo nga 9 ka hamtong ug 4 ka bata ang namatay, samtang 4 ka indibidwal ang namatay sa San Remegio, sumala sa Cebu Capitol PIO.
Ang mga awtoridad nagpadayon sa search and rescue operations.
