CEBU CITY — Nadugangan og 103 ka mga bag-ong kaso sa coronavirus disease o COVID-19 sa tibuok lalawigan sa Sugbo sa nakalabay nga 24 oras.
Sa dakbayan sa Sugbo, niabot na sa 1,660 ang confirmed cases sa coronavirus human nga nadugangan og 91 ka mga bag-ong nagpositibong pasyente.
Sa record gikan sa Cebu City Health Department, nagagikan sa Brgy. Tejero ang labing daghang natala sa mga bag-ong kaso diin nadugangan kini og 56.
Napun-an usab og unom ka mga bag-ong kaso sa COVID-19 sa dakbayan sa Lapu-Lapu hinungdan nga anaa na sa 48 ka mga total cases.
Samtang niabot na sa 110 ang mga natakdan sa COVID-19 sa dakbayan sa Mandaue human napun-an og usa ka bag-ong kaso.
Gibutyag usab ni Governor Gwendolyn Garcia nga napun-an og lima ka mga bag-ong kaso sa COVID-19 sa Cebu Province diin upat niini ang nagagikan sa Cebu Provincial Detention and Rehabilitation Center (CPDRC) ug usa gikan sa dakbayan sa Talisay.
Hinungdan nga nisaka ngadto sa 55 ang mga natakdan sa coronavirus sa uban pang bahin sa Sugbo.
Sa kinatibuk-an, anaa na sa 1,873 ang total confirmed cases sa COVID-19 sa tibuok isla sa Sugbo. (GN)
