PROVINCE OF CEBU- Nagpahigayon ang Kagamhanan sa Probinsiya sa Sugbo og welcome dinner alang sa mga delegado nga mitambong sa ika-23 nga East Asia Inter-Regional Tourism Federation (EATOF) Standing Committee Meeting, Lunes, Hulyo 21,2025.
Sa iyang welcome remarks, si Cebu Governor Pamela Baricuatro mipahayag nga ang maong panagtapok dili lamang usa ka tigom sa mga lider sa rehiyon, kundili usa usab ka selebrasyon sa ilang gi-ambitang pasalig sa pagtukod og usa ka buhi, lig-on, ug inklusibong panan-aw sa turismo sa tibuok East Asia.
Ang Standing Committee Meeting ipahigayon sa Sugbo gikan Hulyo 21 hangtod 23, ug kini magsilbing pasiuna sa EATOF General Assembly, nga gikatakdang i-host sa Probinsya sa Sugbo sa sunod tuig.
Samtang, si EATOF Secretary General Kim Kweon-jong misuporta sa mensahe ni Gobernador Baricuatro, nga naghulagway sa maong miting isip usa ka plataporma alang sa pagpaambit sa paglaum ug pagpalig-on sa kolaborasyon sa mga nasud nga sakop sa pederasyon alang sa maayong kaugmaon sa rehiyonal nga turismo.
Gipangulohan ni Bise Gobernador Glenn Anthony Soco, inubanan sa mga sakop sa Cebu Provincial Board, ang ceremonial toast atol sa maong panihapon.
Ang EATOF natukod niadtong 2009 pinaagi sa siyam ka local government units sa East Asia, ug karon nailhan na kini isip modelo sa internasyonal nga kooperasyon sa natad sa turismo.
Sa pagkakaron, ang pederasyon naglangkob sa 10 ka mga miyembro nga probinsiya gikan sa 10 ka nasod:Cebu (Philippines),Gangwon (Korea),Jilin (China),Luang Prabang (Lao PDR),Quang Ninh (Vietnam),Sarawak (Malaysia),Siem Reap (Cambodia),Tottori (Japan),Tuv (Mongolia), ug Yogyakarta (Indonesia).
