Nagtapok ang Kagamhanan sa Probinsya sa Sugbo ug ang Dakbayan sa Yokohama, Japan alang sa usa ka workshop nga nagtumong sa pagpasiugda sa decarbonization ug disaster resilience sa Metro Cebu niadtong Huwebes, Pebrero 19, 2026.
Ang maong kalihokan nga gihimo sa Summit Galleria Hotel kabahin sa City-to-City Collaboration Project (C3P) nga gisuportahan sa Ministry of the Environment sa Japan.
Isip chairman sa Mega Cebu, ang Probinsya sa Sugbo maoy nahimong yawe aron matuman ang maong workshop isip kabahin sa “Mega Cebu Vision 2050” alang sa malungtarong kalamboan sa dapit.
Matod ni Elizar Sabinay Jr. sa Provincial Planning and Development Office (PPDO), ang C3P nakatutok sa pagpangita og mga modernong solusyon sa mga problema sa basura, kuryente, ug transportasyon pinaagi sa “greener technologies.”
Sa maong workshop, ang mga dakbayan sa Sugbo, Danao, ug Mandaue nipresentar sa ilang mga proyekto ngadto sa mga kompanya gikan sa Yokohama nga mamahimong investors.
Lakip sa mga giplanong proyekto mao ang solar systems sa mga publikong merkado sa Danao, drainage masterplan sa Mandaue, ug ang paggamit sa electric vehicles ingon man waste-to-energy plans sa Dakbayan sa Sugbo.
Gitambungan usab ang maong tigom sa mga representante gikan sa Talisay ug Lapu-Lapu City.
