Hingpit nang giimplementar sa nagkadaiyang gasoline stations sa tibuok nasud, lakip na ang Sugbo ang pag-usbaw sa presyo sa mga produktong lana karong adlawng Martes, Marso 10.
Gani sukad pa gahapong adlawa, Marso 9, halos walay utlanan ang linya sa mga motorista, pribado ug pampublikong sakyanan man sa nagkalain-laing gas station sa Sugbo, ug hangtod gihapon karong adlawa, diin makita gihapon ang taas nga linya kinsa gikonsidera kining mga motoristaha nga unang nakatagamtam sa taas nga sikad sa produktong lana.
Apan sa pikas bahin, eksklusibong nahinabi sa Bombo Radyo Cebu newsteam si Chiryn Handayan, usa sa mga Green EV taxi driver aron masuta kung unsa usab ang ilang mamahimong habig kabahin sa maong hisgutanan, aron masuta kung aduna ba kini direktang epekto nila ang pagsaka sa produktong lana.
Matod ni Handayan, nakabentaha sila karong panahona gumikan kay dili man sila maggamitan og gasolina, kay full-electric man ang gigamit karon sa Green GSM Taxi, mao nga bisan paman padayon ang pagsaka sa presyo sa gasolina, wala kini direkrang epekto nila.
Naasoy usab ni Handayan nga anaa sa maayong kahimtang ang pang-warta niya karon, bisan paman 540 ang adlaw nila, apan kung ang iyahang nalikom nga kwarta sa pagpamasahero makaabot og 1800, aduna man kini siya’y madawat nga 10% komisyon matag semana.
Subay niini, gipagawas na sa Department of Energy ang staggered implementation sa mga adjustment ug ang resulta nga pump prices alang sa Marso 10 hangtud na sa 16, 2026.
Sa unang adlaw sa staggered implementation, sa Shell, ang diesel usbaw og P14.55 matag litro samtang ang gasolina usbaw og P5.25 matag litro, ingon man ang kerosene nga usbaw og P21.60 matag litro.
Samtang sa Petron, ang diesel usbaw og P11.60 matag litro samtang ang gasolina usbaw og P5.20 matag litro, ingon man ang kerosene nga usbaw og P19.00 matag litro.
Sa Caltex, ang diesel usbaw og P2.50 matag litro samtang ang gasolina usbaw og P1.00 matag litro, ingon man ang kerosene nga usbaw og P5.50 matag litro.
