Giaprobahan na sa Senado sa ikatulo ug katapusang pagbasa ang balaodnon nga naghatag og Philippine citinzenships sa mga basketball player nga sila si Maodo “Malick” Diouf ug Elizabeth Jeanette Means.
Gipasar sa mga Senador ang House Bill Nos. 6640 ug 6641 aron mahimong hingpit nga Pilipino ang duha, nga makatabang sa pagpalig-on sa programa sa basketball sa nasud.
Gipangulohan ni Senador Francis “Kiko” Pangilinan ang pag-sponsor sa maong balaodnon, nga iyang gidayeg tungod sa dakong kontribusyon sa duha ka atleta sa basketball program sa nasud.
Ipadala na kini karon sa Opisina sa Presidente aron pirmahan ni Presidente Ferdinand Marcos Jr. ug mahimong balaod.
Si Diouf nagdula isip usa ka foreign student athlete sa University of the Philippines, diin siya ang yawe sa pagdaog sa Fighting Maroons sa UAAP Season 84 men’s basketball championship niadtong 2022.
Samtang, si Means nagdula sa NCAA Division II sa US alang sa Westminster University, diin ang iyang pamilya gikan sa Naga, Camarines Sur.
