CEBU CITY — Gikatakdang makig-alayon ang mga sakop sa Talisay City Fire Department ug mga kawani sa Talisay City Central School alang sa imbestigasyon sa nahitabong sunog sa maong tunghaan sa miaging gabii.
Kini human nga na-partially burned ang duha ka mga classrooms sa nahisgutang tunghaan diin gisaka kini sa Task Force Alpha.
Matud sa fire investigator nga si Senior Fire Officer III Sherwin Algoso, nga nagsugod ang sunog sa usa ka bakanteng luna sa tunghaan diin nagtapok ang mga armchairs nga hinimo sa kahoy.
Daling miresponde ang kabumberuhan sa nasunog nga bahin sa tunghaan ug pagkalabay sa kapin tunga sa oras, napawong kini dayon.
Dugang pa ni SFO3 Algoso nga mibalor ngadto sa 60,000 ang danyos sa maong sunog diin naugdaw ang mga nagtapok nga lingkoranan tungod sa rubbish fire.
Nakugang ang pipila ka mga residente nga nagpuyo duol sa tunghaan human miulbo ang maong sunog.
Matud sa residente nga si Roy Abuya nga naghinayhinay og pagpanghakot og mga gamit ang iyang mga silingan aron lang maluwas sa maong sunog.
Unang nabantayan ni Abuya nga adunay nagdaub sa luyong bahin sa tunghaan diin nahimutang ang mga gipangtapok nga armchairs.
Nagpasalamat hinuon si Abuya nga wala malakip sa pagkasunog ang ilang panimalay.
Samtang gibutyag sa pangulo sa City Of Talisay Traffic Operations Development Authority (CT-TODA) nga si Joy Tumulak nga wala misamot ang kabug-at sa trapiko gumikan kay gi-man sa iyang mga sakop ang kadalanan duol sa nahitaboan sa sunog.
Dugang pa ni Tumulak nga daling nakontrolar ang sunog gumikan sa daling pagresponde sa mga bumbero.
Nagpasalamat kini sa koordinasyon sa mga bumbero ug katawhan hinungdan nga wala na midako pa ang maong sunog.
Hinuon walay natalang mga namatay o naangol sanglit wala may klase nianang panahona. (with reports by Bombo Lahvi Quiñones/GN)
