LAPU-LAPU CITY, CEBU-Naugdaw ang walo ka mga balay human miigo ang sunog nga miulbo sa residential area sa Sitio Bagumbayan 1, Brgy. Maribago sa dakbayan sa Lapu-Lapu niadtong Martes, Hulyo 2 ning tuiga.
Basi sa imbistigasyon sa kabomberohan nga niabot og P2.5 milyon ang danyos sa mga kabtangan sa mitumaw nga sunog.
Matud ni Senior Fire Officer 1 Oiretuele Baguio sa Lapu-Lapu City Fire District nga ang sunog nasubay nga nagsugod sa pinuy-anan ni Melody Omongos.
Gisaysay niini nga ang sunog niulbo samtang nangatulog si Omongos ug mga sakop sa iyang pamilya ug dali kining mikaylap sa laing pito mga estraktura nga anaa sa duol niini.
Unom ka mga balay ang hingpit nga nasunod ug duha ang nangaguba.
Ingon man nga sa maong insidente wala’y natala nga naangol sa mga nasunogan.
Gitan-aw karon sa mga otoridad ang tanang anggulo aron masuta ang tinuod nga hinungdan sa sunog.
Dugang niini, ila usab nga gitan-aw ang hinungdan sa mga buto nga nadunggan sa dihang niulbo ang sunog.
Sa laing bahin, giawhag ni Baguio ang mga lumolupyo sa dakbayan sa Lapu-Lapu nga motawag dayon sa labing duol nga fire station kon adunay sunog aron masiguro ang dinaliang pagresponde.
