CEBU CITY — Duha ka mga insidente sa sunog ang natala sa Metro Cebu subay na sa pagsugat sa bag-ong tuig.
Naugdaw ang usa ka staff house sa usa ka pharmaceutical company human nahitabo ang sunog sa Barangay Buaya, dakbayan sa Lapu-Lapu.
Nakadawat ang mga kabumberuhan og alarma sa takna nga 6:25 kagabii ug nakontrolar kini pagkalabay sa usa ka oras.
Matud ni Senior Fire Officer 1 Hajji Samonte sa Lapu-Lapu City Fire Department nga ila pang gisuta kung unsa man ang hinungdan kung nganong gilamoy sa ka’yo ang duha ka kwarto sa maong staff house.
Sa pagkakaron, wala pay natalang injuries o casualties human sa maong sunog sanglit walay tawo ang maong kwarto.
Mokabat ngadto sa P120,000 ang danyos human sa maong sunog.
Samtang padayong giimbestigaran sa kabumberuhan ang laing sunog sa usa ka garahean sa mga taxi vehicles sa Sitio Langob, Barangay Kalunasan, dakbayan sa Sugbo.
Nakadawat ang kabumberuhan og alarma sa oras nga 3:25 kagahapon sa hapon ug giisa kini ngadto sa second alarm.
Nakontrolar sa mga bumbero ang maong sunog pagkalabay sa 39 minutos ug napawong kini human sa dul-an siyete ka oras.
Matud ni Senior Fire Officer 3 Hermes Molina sa Cebu City Fire Department, nga nabantayan sa mga residente nga nasunog ang garahean sa Spider Taxi tungod sa nagsiga nga pabuto.
Dugang pa niini nga ila pang giila kung kinsa ang nagpabuto nga maoy responsable sa pag-ulbo sa maong sunog.
Gibana-banang mokabat ngadto sa P10,000 ang danyos sa maong dakong sunog.
