LAPU-LAPU CITY, CEBU-Mokabat sa upat ka pamilya, gilangkuban sa 12 ka mga indibidwal, ang nawad-an og panimalay sa sunog nga miulbo sa usa ka residential area sa Sitio San Roque, Upper Kagudoy sa Brgy. Basak sa dakbayan sa Lapu-Lapu niadtong Sabado sa buntag Hulyo 6, 2024.
Sa unang alarma sa sunog nga niugdaw sa tulo ka mga panimalay gikataho sa wala pa ang alas 9:30 sa buntag ug kini nakontrolar alas 9:46 sa buntag sa wala pa kini hingpit nga napawong alas 9:54 sa buntag.
Mokabat sa P180,000 ang danyos sa mga kabtangan sa sunog niadtong Sabado sa buntag.
Mipahayag si Fire Officer 3 Jeffrey Gerodiaz, ang fire investigator sa maong lugar nga walay gikatahong naangol atol sa sunog.
Dugang pa ni Gerodiaz nga ang sunog nasubay nga nagsugod sa kusina sa pinuy-anan ni Denia Padillo.
Iyang gitan-aw ang posibilidad sa pagbuto sa butane canister nga maoy hinungdan sa sunog.
Kasamtangang nagpadayon ang imbestigasyon sa maong sunog.
