Nakita sa Cebu City Fire Department nga arson ang posibleng hinungdan sa dakong sunog kagahapon sa Sitio Panagdait, Brgy. Kasambagan, dakbayan sa Sugbo.
Gilamoy sa dakong ka’yo ang gibana-banang anaa sa 25 ka panimalay ug mokabat ngadto sa tunga sa milyon ka pesos ang natala niining danyos.
Nakadawat ang kabumberuhan og alarma sa takna nga 3:15 sa hapon diin giisa kini sa 3rd alarm ug napawong kini pagkalabay sa halos unom ka oras.
Matud sa imbestigador nga si Fire Officer 2 Emerson Arceo nga miulbo ang dakong ka’yo gikan sa panimalay ni Guillermo Canabe Sr.
Dugang pa ni Arceo nga napalgang patay ang usa ka mentally-illed person nga giilang si Alyas Leo human giingong natanggong sa ilang panimalay.
Apan nasikop usab ang giingong nagmugna sa maong sunog nga si Jongjong Canabe ug mi-angkon dayon sa maong salaud.
Matud ni Jongjong nga naglalis kini sa iyang amahan ug gumikan sa tumang kalagot, gipakusgan niya og siga ang butane canister stove.
Mi-angkon usab ang anak sa tag-iya sa panimalay nga tiggamitan kini og ginadiling drugas.
Tungod niini, nangayo og pasaylo ang maong suspek human sa maong dakong katalagman.
Gipaubos karon sa kustodiya sa Mabolo Police Station ang nahisgutang dinakpan.
Kahimtang sa mga nasunugan
Nagpalabay sa kagabihon ang moabot sa 149 ka mga pamilya sa evacuation center human gilamoy sa dakong ka’yo ang ilang pinuy-anan sa Kasambagan.
Matud sa kapitan nahisgutang barangay nga si Franklyn Ong nga daling miresponde ang mga sakop sa Department of Social Welfare Services (DSWS) sa Cebu City Governnment aron i-assess ang mga nasunugan.
Dako ang pasalamat ngadto sa DSWS human nga nakapanihapon ang gatusan ka mga residente ug mi-abag usab kini og generator sa evacuation center.
Naka-install usab sila og portalets alang sa mga residente nga namakwit gikan sa dakong sunog.
Dugang pa ni Ong nga mopahigayon ang barangay council og emergency session aron ipaubos ang barangay sa state of calamity.
Kini aron magamit ang ilang calamity fund isip hinabang ngadto sa mga residente.
Mi-awhag usab si Ong sa mga adunay malumo nga kasingkasing nga ihatod ngadto sa barangay hall o sa evacuation center ang ihatag nga hinabang ngadto sa mga nasunugan.
