Nagpabiling lig-on ang suplay sa bugas sa Pilipinas, bisan pa sa epekto sa gubat sa Middle East sa pangkalibutanong pamatigayon.
Sumala ni National Food Authority (NFA) Administrator Larry Lacson, bisan tuod siguradong maapektuhan ang pamatigayon sa bugas, ilabina sa mga nasud nga nag-import sama sa Pilipinas, lig-on ang imbentaryo sa bugas sa nasud aron matubag ang panginahanglan o konsumo.
Gihatagan niya og ehemplo ang suplay nga gihuptan sa NFA, diin ang ahensya aduna pa’y hangtod sa 2.6 milyon nga sako sa ginaling nga bugas.
Moabot sa 600,000 ka sako niini ang gitagana na alang sa mga mananaog sa subasta, samtang duha ka milyon nga sako ang gitagana alang sa mga panginahanglan sa publiko ug gobyerno.
Kung tipunon ang kinatibuk-ang suplay lakip na ang wala pa gigaling nga bugas, matod niya nga ang ahensya karon adunay hangtod sa walo ka milyon nga sako sa bugas.
Kini anaa sa 10.3 ka adlaw nga suplay alang sa tibuok Pilipinas.
Kini dugang pa sa kadaghanan sa lokal nga bugas nga gilauman nga moabot karong panahon sa pag-ani, ug ang kadaghanan sa bugas (lokal ug imported) nga gihuptan sa mga negosyante sa bugas sa ilang tagsa-tagsa ka bodega.
Gipasiugda ni Lacson nga bisan pa man og regular nga nagpagawas ang ahensya og daghang kantidad sa bugas para sa programa sa Benteng Bigas ug sa mga panginahanglan sa nagkalain-laing ahensya sa gobyerno, nagpadayon gihapon kini sa pag-stock og sobra sa napulo ka adlaw aron masiguro nga andam ang bugas para sa bisan unsang emerhensya.
