Nagkatigom ang mga tigpaluyo ni kanhi Pakistani Prime Minister Imran Khan aron manawagan alang sa iyang pagpagawas.
Gibutyag sa pamilya ni Khan nga hapit na mabuta ang iyang tuo nga mata, apan wala pa’y aksyon nga gihimo ang mga awtoridad sa prisohan kalabot sa iyang kahimtang.
Ang kanhing cricket star nga nahimong politiko nag-atubang og kapin sa 100 ka kaso ug gisentensiyahan og kapin sa 17 ka tuig nga pagkabilanggo tungod sa mga kaso sa korapsyon niadtong miaging tuig.
Pipila sa mga kaso batok kaniya naglambigit sa giingong state secrets ug pagbaligya sa mga regalo nga nadawat sa gobyerno.
Gipriso si Khan niadtong Agosto 2023, uban sa iyang asawa nga si Bushra Bibi.
Samtang, gipakatag ang mga pulis palibot sa prisohan diin gitanggong si Khan aron mapugngan ang posibleng kagubot o dili maayong insidente nga mahimong maglambigit sa ubang mga piniriso.
