CEBU –Hugaw ug dili makatarunganon ang nahitabo nga eleksyon sa lungsod sa Cordova niadtong Mayo 9.
Kini ang paghulagway sa usa ka supporter ni outgoing Mayor Techie Sitoy-Cho, atol na sa ilahang gipahigayon nga lihok protesta kaganihang buntag atubangan mismo sa munisipyo sa naasoy nga lungsod.
Gibutyag ni Romel Angco, nga daghan nilang mga watcher ang gikuha-an ug katungod, diin giingong mahimo lang nga mismong mga magtutudlo ang mahimong watcher atol sa eleksyon.
Gituohan nila nga adunay halapad nga pagpanikas niadtong nakalabay nga pinili-ay.
Samtang, gitino ni Police Major Ramil Dugan, ang hepe sa Cordova Police Station, nga nagmalinawon lang ang gipahigayon nga lihok protesta.
Gibana-bana nga mukabat sa 800 ka mga supporter ni Mayor Sitoy-Cho ang nagtapok arun nga ipadayag ang ilahang mga yangu-ngo sa gituohang tikas sa eleksyon.
Samtang, 24 ka mga police personnel lakip na ang ilahang mga intelligence ang gipakatap atol na sa naasoy nga kalihokan.
Hinuon, wala man sila’y na-monitor nga kalihokan tugbang sa mga supporter sa midaug nga mayor sa lungsod nga si Didoy Suan.
