Nipahigayon og surprise drug-test ang sakop sa Philippine Drug Enforcement Agency-7 alang sa mga operators sa Cebu South Bus Terminal ug sa Cebu North Bus Terminal karong adlawa, Oktobre 29, 2025.
Matod pa, kung adunay mag-positive sa maong drug test, ipa-ubos pa sa confirmatory aron masayran usab kung unsa ang angay buhaton.
Atol sa ekslusibong pakighinabi sa Bombo Radyo Cebu team kang Leah Alcantara ang Information Officer sa PDEA-7 nga ipaubos pa sa confirmatory ang mga bus drivers, mini bus drivers, lakip ang mga driver sa van, ug konduktor ang magpsitbo sa drug test.
Giklaro usab ni Alcantara nga ang kini nga drug test dili nagpasabot nga dakpon ang mga operators kung ugaling magpositive sila, apan ang bugtong katuyoan niini nga mahatagan og kasiguradoan nga adunay silay kaamgohan nga gikinahanglan ang mga driver sa susamang mga sakyanan, dako og tulubagon kung motumaw na ang emerhensya ubos sa ilahang serbisyo.
Samtang, gitataw usab niya nga bisan og alas 8:00 hangtud alas 5:00 sa hapon pa kini nga kalihokan, dili usab sila kasiguro og aduna or wala bay laing adlaw nga ipahigayon ang susamang kalihokan, ilabi na nga kini usa ka suprise drug test.
Ang maong surprise drug test nga gipahigayon sa PDEA-7 subay sa ilahang preparasyon sa nagkaduol nga kalag-kalag, kay kini man ang usa sa mga adlaw nga dagsa usab ang mga pasahero sa mga bus terminals, ilabi na sa Sugbo.
Kaganihang pasado alas 10:00 sa buntag, aduna nay usa ka driver ang natalang nag positibo.
