CEBU CITY – Gipasakaan og kasong muder ang suspek sa pagpatay ni Christine Lee Silawan, kinsang gipatay ug gilaplapan ang nawong niini sa Lapu-Lapu City.
Kini human nga nahimong emosyonal ang kabanay sa biktima human nga gi-cross examine sa igsoon ni Christine ang “self-confessed killer” si Renato Llenes.
Si Lucilyn Silawan, ang maguwang ni Christine, ang nangutana sa suspek sa mga conversation niini sa chat sanglit nasayod man kini sa ilang online conversation agi na usab sa pagpamtuod nga si Llenes gyud ang suspek.
Sa dihang gisugdan na pagpangutan si Llenes kung asa dapit siya nagpuyo agi’g pagpaila ni Christine sa chat, ug ingon man ang mga oras nga magkita sila ug tanang detalye nga naa sa chat, natubag kini tanan ni Llenes ug mitakdo ang tanang detalye.
Aduna pay higayon nga sama sa gi-usab ni Lucilyn ang oras sa ilang panagkita apan miinsister ang suspect sa sakyong detalye butang nga nakombinsir ang kabanay nga si Llenes gyud ang kriminal.
Gani ila pa kining gisugo sa pagpa-open sa “dummy” nga social media account ang suspek ug sa dihang na-open kini, dinhi na nagsiyagit sa kalagot ug nahimong emosyonal ang kabanay ni Silawan.
Gawas sa mga kabanay ni Christine, misaksi usab si Lapu-Lapu City Mayor Paz Radaza sa pag-access ni Llenes sa giingong dummy nga account.
Subay niini, nagmalipayon usab si Police Col. Lemuel Obon, ang Police Director sa Lapu-Lapu City, nga nasulbad na nila ang kaso.
Apan dako lamang niya nga kasagmuyo tungod kay wala naman magpakita ug wala na mikooperar kanila ang ginikanan ni Christine bisan paman sa mga ebedinsya nga ilang gipresentar.
Si Obon mismo ang mipasaka og kaso batok sa 42 anyos nga suspek nga si Llenes.
Bisan nga wala nagpakita ang ginikanan sa buhatan sa kapulisan, gi-angkon ni Obon nga nasakitan siya sa dihang mibalibad ang inahan nga si Lourdes Silawan human nga wala mihatag og panahon sa pagsang-at og kaso.
Samtang gisaysay Lapu-Lapu City Police Director nga kabahin lang sa ilang pagserbisyo ang naagi-an nga mga kahago sa pagsulbad sa kaso sa linuog nga pagpatay ni Silawan.
Subling gitino ni Obon nga wala sila nag-apas sa reward money o premyo apan ang ila karon mao ang pakig-alayon sa pamilya.
Nanghinaut usab siya nga ang piskaliya lang ang magtimbang-timbang sa kaso nilang Alyas Jun ug Llenes sa pagpatay ni Christine Lee. (FDP/GN)
