CEBU – Gitanggong na sa Naga Police Station ang suspek sa pagpatay sa usa ka public school teacher sa Dakbayan sa Naga, human kini masikop sa San Carlos City, Negros Occidental, Lunes sa gabii, Oktubre 17.
Nadakpan sa pantalan sa San Carlos City si Elmar Gemida, 24, atol sa hot pursuit operation nga gipangulohan ni Police Lieutenant Colonel Junnel Caadlawon, hepe sa Naga City Police Station.
Kini human si Gemida nagtago-tago human siya giingong nidunggab kang Jhun Leo Pañares, kansang lawas napalgan sulod sa lawak sa Barangay Inoburan niadtong Domingo, Oktubre 16.
Samtang sa habig sa suspek nga si Gemida,nagkanayun kini nga nagbasol siya sa pagpatay kang Pañares ug midugang nga napugos siya sa pagbuhat niini aron mapanalipdan ang iyang kaugalingon.
Gihimug-atan sa igsoon ni Jhun Leo Pañares, nga si Jeppee Pañares, nga naglisud sila pagdawat sa nahitabu sa iyahang igsoon, apan ilang gikalipay usab nga daling nadakpan ang suspetsado, apan iyahang gikaguol ug gilimod ang mga pamasangil sa suspek, kini gumikan kay maayung tawo ang iyahang manghud.
Nasayran nga narekober sa kapolisan gikan sa posesyon ni Gemida ang motorsiklo ni Pañares dihang nasikop kini sa San Carlos City, Negros Occidental.
