Patay ang pulis human gipusil sa usa ka wala pa nailhing lalaki nga miilog og pistola ngadtu sa usa ka Security Guard, karong hapon sa Byernes, Hunyo 27, 2025.
Nahitabo ang insidente sa alas 12:20 sa udto, diin, adunay gikataho nga usa ka lalaki nag bitbit ug pistola nga .38 revolver nga adunay tulo ka mga buhing bala, sa dalan P. Del Pilar, Brgy Poblacion, dakbayan sa Danao.
Busa, dali kining gi respondehan sa usa ka Patrolman Police ug usa ka BJMP Personnel nga anaa sa duol sa maong area samtang aduna silay gilakaw sa korte.
Gigukod ang maong suspek sa duha ka mga awtoridad gamit ang motorsiklo, og sa dihang pag-naog sa pulis ug daling pag kupot niini sa luyo kalit ni-pusil ang maong suspek sa pulis, ug naigo ang bahin sa nawng niini, hinungdan sa iyang kamatayon.
Nisuway pa og ikyas ang maong suspek, apan gipusil kini sa kauban nga BJMP personnel ug patay usab kini, diha diha dayun.
Dugang niini, gisuwayan pa kini og dala sa duol nga tambalanan ang duha ka mga nahagba, apan gideklara na kini nga dead on arrival.
Atol sa pakighinabi sa Bombo Radyo Cebu Team kang Alberto Lacio ang security guard nga giilogan og pusil sa maong lalaki, iyang gikabutyag nga samtang nagpalit siya og softdrink sa usa ka tindahan duol sa gidutyhan niini nga pawnshop, kalit lang nga gikuha ang iyang .38 revolver nga nakabutang sa kilid niini nga walay locker set.
Naasoy usab ni Lacio nga gitiunan pa siya sa maong lalaki ug gikablit ang trigger sa pistola, apan natumong sa blanko nga sudlanan sa revolver dihang na swertehan siya og wala kini kabuto. Busa, gisuwayan ni Lacio og dasmag ang suspek, apan nisutoy kini og dagan dala ang pistola.
Sa maong higayon, gireport na sa mga katawhan ang panghitabo sa mga awtoridad (Pulis ug BJMP).
Nailhan ang Pulis nga namatay nga si Patrol Man Mark Ornopia, lima na katuig sa sebisyo isip usa ka pulis sukad sa tuig 2019 sa Danao Police Station.
Sa pagkutlo sa balita, padayun pa ang imbestigasyon sa Danao Police Station ug wapa nailhan ang identity sa maong suspek nga gikabutyag usab nga wala nagpuyo sa nahisgutang dakbayan. (| Bombo Irene Ardiente via Bombo Rocky Lavarez & Bombo Jaira Camello)
