CEBU CITY-Balhog sa Mabolo Police station ang 43-anyos nga habal-habal driver human kini na-caught on camera nga nanulis sa tindahan sa Barangay Apas ning dakbayan sa Sugbo.
Giila ang suspek nga si Wilson Ignacio Baguio, 43-anyos, nga adunay kaipon, taga Sitio Kansas, Brgy. Guadalupe, Cebu City.
Human sa nahitabong pagpanulis kay daling nangayo og tabang ang biktima sa Mabolo Police Station 4 ug gisaysay ang panghitabo.
Diin nagpakaaron-ingnon ang suspek nga kustomer diin pagduol sa cashier gitionan dayon kini sa dalang armas dayong kuha sa tulo ka cellphone ug daling nisibat.
Ingon man nga wala kini nakaikyas tungod sa CCTV footage nga nakita gayud ang iyang dagway.
Sanglit adunay concern citizen nga daling nitaho sa Mabolo Police kabahin sa armed person alarm nga niresulta sa pagkasikop sa suspek.
Ug mitukma sa kuha sa CCTV nga nagtumbok nga mao kini ang responsable sa pagpanulis sa maong tindahan.
Nakuha gikan sa posisyon ni Baguio ang tulo ka bulto sa gituohang shabu ingon man usa ka .38 revolver nga adunay tulo ka bala.
Patong-patong nga kaso ang gihikay na karon batok sa suspetsado sama sa kasong robbery, illegal possession of firearms ug ang kalapasan sa Republic Act 9165 kun ang paghupot og illegal nga drugas.
