CEBU CITY-
Nadakpan ang usa sa duha ka mga suspek nga nangholdap og taxi driver sa mga estambay sa Sitio Pandayan, Barangay Basak San Nicolas, dakbayan sa Sugbo pasado alas 6 sa buntag sa Sabado, Oktubre 21, 2023.
Giila ang suspek nga si Raymund Flores, 33, taga lungsod sa Daanbantayan, amihanang Sugbo.
Samtang nakalingkawas sa pagkasikop ang iyang kauban nga si JC Ortega, 21, taga Sitio Lawis, Barangay Mambaling, dakbayan sa Sugbo.
Matod sa biktima nga si Ponciano Mandawi Jr., usa ka taxi driver nga taga Barangay Mohon, dakbayan sa Talisay, ang mga suspek sakay sa iyang taxi sa Barangay Tejero ug nihangyo nga ihatod sa Talisay City, apan pag-abot nila sa ilang destinasyon, nitug-an na usab sila nga paingon sila sa dakbayan sa Lapu-Lapu, samtang niabot na sa P600 ang pletehan nga makita sa metro sa taxi.
Apan samtang nagbyahe, niti-on ang duha og kutsilyo ngadto sa driver ug nipahibawo nga holdap.
Matod pa sa case investigator sa Mambaling Police Station nga si Police Senior Master Sergeant Anthony Adizas, nga nihangyo nga nihangyo ang biktma ngadto sa mga holdaper nga dili siya patyon tungod kay aduna siyay pamilya nga gisuportahan.
Gibutyag usab sa opisyal nga nipadaplin si Mandawi ug nangayo og tabang dihang namatikdan niya ang daghang mga tawo nga nagtan-aw sa Sitio Pandayan.
Kini maoy naka-aghat sa mga suspek nga misibat sa nagkadaiyang direksyon.
Apan daling migukod ang mga nanan-aw ug nasikop si Flores sa sudlonong bahin sa naasoy nga sitio.
Si Flores anaa na karon sa kustodiya sa Mambaling police station.
Gigukod sila sa mga estambay hangtod nga misulod sila sa sudlonong bahin sa sitio kung diin usa sa suspek ang malampusong nadakpan.
Gibutyag na usab sa mga sakop sa kapulisan nga wala makuha sa mga suspek ang kita sa taxi driver.
