CEBU CITY-Gipasakahan na og kaso ang suspek sa pagpatay sa dalagitang si Neca Denise Lagria og sa paglabay niini sa South Road Properties (SRP) niadtong Nobyembre 19, 2024.
Kasong kalapasan sa Republic Act 10591 (Illegal possession of firearms) ang usa sa mga kasong giatubang sa suspek nga si Godofredo Brufal gawas pa sa kasong murder nga atubangon.
Kahinumduman nga si Brufal nadakpan niadtong Miyerkules sa kaadlawon, Nobyembre 20 sa Barangay Sab-a, Lungsod sa San Remigio ug nakuhaan kini og kalibre .38 nga revolver.
Gawas niini, nakuha sab sa kapulisan ang cellphone sa biktima sa panimalay sa mismo sa suspek kinsa miangkon sab sa nahimong krimen.
Nagkanayon si Police Major Efren Diaz Jr., hepe sa Mambaling Police Station 11 sa Cebu City Police Office (CCPO) nga giuna nila sa pag file ang kalapasan sa RA 10591 sanglit nagpaabot pa sila sa resulta sa forensic examination sa patay’ng lawas biktima alang na unya sa pagpasaka og laing mga kaso.
Nasayran nga duna nay extrajudicial confession ang suspetsado ug miangkon kini sa pagpatay sa biktima.
Samtang sa pikas bahin, anaa na sa ilang panimalay ang patayng lawas ni Lagria sa ikaduhang adlaw sa haya niini ingon man sa paghatag og ulahing lantaw ngadto sa iyang kabanay.
Sa eksklusibong pakighinabi sa Bombo Newsteam kang Joevian Lagria-Lepiten, usa sa mga igsoon sa biktima diin gitataw niini nga dakong kasubo gihapon nila ang gibati sa tibuok banay nila apan arang-arang nalang kini kay nahatagan nila og haom nga seremonyas sa pagtaliwan ang ilang kamanghurang igsoon.
