CEBU CITY — Gi-imbestigaran sa kapulisan ang insidente sa pagkamatay sa suspek sa kamatayon ni Christine Lee Silawan sa male dormitory sa dakbayan sa Lapu-Lapu.
Kini human nga napalgang patay ang suspek sa pagpatay ni Christine Lee Silawan nga si Renato Llenes niadtong Mayo 24 sa buntag.
Matud sa imbestigador sa Lapu-Lapu City Jail nga si Jail Officer 1 Dennis Balabat nga nigamit og improvised nga pisi ang suspek nga hinimo gikan sa gigisi-gisi nga sinina.
Base sa pasiunang imbestigasyon, wala nabantayan sa tulo ka mga kauban niini sa selda sa maong panghitabo hangtud nga nakit-an sa usa sa mga piniriso nga wala nay kinabuhi ang suspek sa kasilyas.
Gisuway unta og dala sa tambalanan si Llenes apan gideklarar kini nga dead on arrival.
Gibutyag usab ni Balabat nga nihatag si Llenes sa iyang mga sinina ngadto sa mga kauban niini sa infirmary, pipila ka oras sa wala pa nahitabo ang maong insidente.
Nasayran nga gibutang sa infirmary ang suspek sa pagpatay sa dalagita human nakadawat og hulga.
Kahinumduman nga si Llenes ang gitudlong responsable sa pagpatay kang Silawan niadtong Marso 2019 human kini masikop sa may Barangay Bangkal, Lapu-Lapu City.
Gipatay sa suspect ang biktima pina-agi sa pagdunggab sa makadaghang higayon una gipanitan niini ang nawong.
Nasayran nga nagkarelasyon ang duha human nga nigamit og fake account sa facebook ang suspek aron tintalon ang biktima nga makigrelasyon.
Apan nisangpot nga nadiskubre niini ang tinu-od nga sitwasyon butang nga gikadismaya.
Nagselos usab matod pa ang suspek sanglit aduna nay kanhi nga gika-relasyon ang biktima. (with reports by Bombo Joann Gantalao/gbs/gin)
