Gikatakdang pasakaan og kasong human trafficking si suspended Bamban, Tarlac Mayor Alice Guo ug iyang mga kauban karong semanaha.
Gipasabot ni Presidential Anti-Organized Crime Commission (PAOCC) spokesperson Winston Casio nga posibleng manubag sa nasangpit nga kaso ang suspendidong mayor tungod kay partial ownership siya sa mga propyedad diin nahitabo ang giingong human trafficking activities sa gironda nga POGO hub sa Bamban.
Mao nga masaligon sila nga adunay kasong human trafficking nga ipasaka batok sa mayor.
Gikutlo usab ni Casio ang usa ka probisyon ubos sa anti-human trafficking law nga nagpahamtang og silot sa mga tag-iya sa mga building ug mga kabtangan nga nagtugot kanila nga magamit alang sa mga kalihokan sa human trafficking.
Sa pagkakaron, gitan-aw sa PAOCC ang uban pang posibleng kaso nga may kalabotan sa money laundering ingon man ang posibleng minor charges.
