CEBU CITY- Gipamatud-an sa Office of the Ombudsman nga sad-an sa kasong ‘nepotism ug grave misconduct’ si suspended Cebu City mayor Michael Rama.
Sa hukom nga gipetsahan niadtong Septiyembre 25, 2024, ang Ombudsman nipahamtang kang Rama og “penalty of dismissal from the service which shall carry with it cancellation of eligibility, forfeiture of retirement benefits gawas sa naipon nga leave credits, ug perpetual disqualification for reemployment in the government service.”
Sa pakighinabi sa Bombo Radyo Cebu kang Cebu City Councilor Noel Wenceslao, usa sa mga kaalyado ni Rama sa politika niingon nga wala sila masurprisa sa nasangpit nga desisyon sa Ombudsman apan dili pa kini ang kataposan tungod kay moapelar kini sa taas nga hukmanan tungod kay dili pa ‘final and executory’ ang desisyon ug posible pa nga makadagan ang mayor sa umaabot 2025 nga piniliay.
Kagahapon lang sa buntag, abtik nga nagparada si Rama uban sa iyang lokal nga partido, Partido BARUG, aron sa pag-file sa Certificate of Candidacy, uban sa ilang mga dumadapig nga nagsinggit og “Team RAMA, daog!”
Kahinumduman nga si Rama gipasakaan og kasong nepotismo sa miaging tuig ni Jonel Saceda alyas “Inday Jose Chongbian Osmeña” tungod sa pagbutang sa mga igsuon sa iyang ikaduhang asawa nga sila si Malou Mandanat Rama, Elmer Gimenez Mandanat ug Gomer Gimenez isip mga kaswal nga empleyado sa Cebu City Hall.
Sa pagkagabii, si Rama niluwat og pamahayag kalabot sa desisyon sa Ombudsman, nga nagkanayon nga nagpadayon pa ang away aron mapauswag ang mga proyekto ug programa nga nasugdan ubos sa iyang administrasyon isip mayor sa nabantog nga dakbayan sa Sugbo.
