Gikompirmar ni Engr. Leslie Anthony Molina, ang pangulo sa First District Engineering Office sa dakbayan sa Talisay, nga ang maong mikatap nga video sa social media nga adunay bulletin transparency board nga nahimutang sa bukirang bahin sa Dakbayan, usa ka suspended project ug dili ghost project.
Kini gumikan kay nakasugat sila ug kakulian sa pag-asikaso sa mga rekisitos susama sa pagcomply sa Environmental Compliance Certificate ug rekisitos usab sa Protected Area Management Board ngadto sa buhatan sa Department of Environment and Natural Resources.
Lakip na usab nga usa sa nakabalda sa maong proyekto ang isyu ay kalabutan sa Road Right of Way Issues nga wala pa mahimutang.
Giklaro usab ni Molina, nga bisan pa ug suspindedo ang maong proyekto, padayun pa gihapon sila nga naningkamot sa pagpakig-alayon aron nga mahatagan sila ug permit nga makapadayun sa proyekto.
Gihimug-atan usab niini nga dili mabalaka sa budget gumikan kay walay gipahigayung billing ug anaa ra ang budget niini ug ibayad lang kini kung ugaling sugdan na sa contractor ang maong proyekto.
Samtang sa pikas bahin, una na usab nga gipaabut ni Talisay City Mayor Sam Sam Gullas ang iyang concern nga unta ipahibalo sa DPWH ang proyekto kung suspended kini kay aron mahatagan ug katin-awan ang katawhan gumikan sa gibutang completion date niini.
