Gikabutyag ni Ellen Maghanoy, ang President of the Federation of Cebu Transport Cooperatives, nga niabot na sa ilahang habig ang bag-o karong fare matrix sa dugang 2 pesos nga plitihan karon sa modern jeepneys.
Atol sa eksklusibong pakighinabi sa Bombo Radyo Cebu kaniya, gipamahayag ni Maghanoy nga sa higayon nga makakuha na og permit ang ilahang buhatan o taripa gikan sa Land Transportation Franchising and Regulatory Board (LTFRB), diha na nga higayon ma implementar ang maong fare hike nga kanhing 15 pesos, mamahimo na kinig 17 pesos.
Apan sa wala pa silay nadawat nga taripa gikan sa LTFRB, dili pa mamahimong ipa implementar nila kining bag-ong usbaw sa plitihan.
Gipanglangtawan usab ni Maghanoy nga sa pagkakaron, gipaningkamotan na nila nga makakuha og taripa gikan sa LTFRB para ma implementar na ang fare hike sa modern jeepneys, samot na nga sa karon usab, nagkasaka ug nagkadako ang presyo sa diesel.
Hinungdan nga ila kining gipaningkamotan tungod kay ang maong 2 pesos nga fare hike dako na og tabang sa modern jeepney drivers sa Sugbo.
Apan, gitino usab ni Maghanoy nga ang maong usbaw sa plitihan dili igong maka aba’g sa pangita apan maayo nalang kay adunay usbaw, gumikan kay nitaas usab ang ilahang diesel consumption sa kasamtangan.
Sa pikas bahin, nitumaw usab ang taho sa pagsuspenso excise tax sa diesel ug sa gasolina, ug matod ni Maghanoy giila gihapong dakong tabang kini gumikan kay makunhoran na sa kapin 5 pesos ang kasamtangang presyo sa diesel.
