CEBU – Gibutyag ni Cebu 3rd District Board Member Atty. John Ismael Borgonia nga posibleng inigka human sa panagtagbo nga mahitabo karong adlaw’ng Lunes, Hunyo 28, 2021 sa Provicial Board ug sa National IATF sa pagpanguna ni DoH Sec. Francisco Duque III, ma-amendahan na ang pipila ka probisyon sa Cebu Provincial Ordinance nga ‘swab-upon-arrival’ alang sa mga interntaional travelers lakip na ang mga Returning Overseas Filipinos ug Overseas Filipino Workers.
Hinuon giklaro ni Borgonia nga magpabilin ang swab-upon-arrival nga palisiya sa Sugbo apan mosunod na sa patakaran sa National IATF nga sulod sa napulo ka adlaw nga i-hotel quarantine ang mga inbound international travelers.
Gibakwi ni Cebu Provincial Governor Gwendolyn Garcia ang giluwatan niini nga Executive Order No. 23 nga nagpahimangno sa mga concerned agencies nga mag-atubang ug silot sa higayon nga dili sundon ang Provincial Ordinance 2021-05.
Matud sa Gobernadora nga ang maong desisyon isip pagrespeto sa pamahayag ni Presidente Rodrigo Duterte kabahin na sa palisiya nga angayang sundon ning panahon sa pandemya.
Subay niini gibutyag ni Borgonia nga nagpakita lang nga dako ug respeto ang Gobernadora sa Presidente ug wala na’y conflict nga mahitabo tali sa National policy ug sa gisunod sa lalawigan nga Provincial Ordinance sanglit ang pagswab test inig abot sa travelers, mao na lang ang kalahian nga gipatuman sa lalawigan apan sundon na ang sa National policy nga 10-day hotel quarantine.
Kahinumduman nga nagkasumpaki ang mga patakaran nga gipatuan sanglit adunay swab test nga mahitabo sa pag-abot sa international travelers sa Sugbo diin sulod sa tulo ka adlaw mamahimo na kini nga makauli sa bayal kung magnegatibo sa test apan subli nga iswab sa ika-pito nga adlaw didto na sa pag home quarantine niini, sukwahi sa national policy nga magpabilin sa accredited quarantine facility ang traveler hangtod sa napulo ka adlaw.
