Mialma ang grupong Pork Producer Federation of the Philippines Inc. sa nagpabiling taas nga presyo sa produktong karneng baboy taliwala taas ug igong suplay gikan sa mga hog farmers ilabi na diri sa Sugbo.
Kini ang gipamahayag ni Eric Harina, ang Presidente sa Pork Producer Federation of the Philippines Inc. sa eksklusibong pakighinabi sa Bombo Radyo Cebu News Team, diin mipahayag kini sa pangutana pud nila ang kamahal sa retail price sa karneng baboy sa kamerkadohan nga aduna may igong suplay sa Sugbo.
Saysay niini nga barato na gani kaayo ang farmgate price sa baboy gikan sa mga nagkadaiyang hog raisers. Ang posibilidad nga gilantaw ni Harina kay ang dakong patong na sa mga retailers sa presyo sa gibaligyang karneng baboy.
Sumala pa ni Harina nga diri sa Sugbo ang farmgate price nga sugyot sa mga hog producers kay anaa lang sa P210 per kilo apan mas ubos kini kun itandi sa aktwal nga presyohan sa merkado nga nagduwa sa P160 ngadto sa P175 per kilo nga barato na kaayu.
Dugang pa nga kung kini ang sukaran, dapat anaa lang sa P300 ngadto sa P330 per kilo apan wala kini natuman kay sa mga kamerkaduhan adunay presyo nga nagduwa sa P380-P400 per kilo depende sa hiwa nga paliton.
Gilatid niini nga igo ug daghan ang suplay sa produktong karneng baboy karon sa Sugbo, ma lokal man o imported lakip na ang mga frozen options.
Gani kun itandi kay niadtong 2024, ang farmgate price kay miabot pa sa kapin P200 per kilo sa susamang panahon sa Kapaskuhan ug Bag-ong Tuig nga average na kini sa tibuok nasud.
Gihinaot niini nga dili tikason sa palit ang mga hod raisers ug producers diin aduna pay higayon nga ang palit kay mas ubos pa kaysa sa gasto sa pagbuhi sa baboy sulod sa pipila ka buwan.
