CEBU CITY– (UPDATE)Personal nga mibisita sa sibyaanan sa Bombo Radyo Cebu ang tag-iya sa boarding house nga gireklamo sa Sitio Anapog Maracas Brgy. Lahug nga si Amalia Bujos human gi reklamo kini ni Rosalia Bornea kinsang residente sa maong lugar kabahin sa baho sa hugaw sa tao sa iyang paabangang balay.
Matud ni Bujos, nga dugay na kini’ng maong reklamo ug nakagasto na siya og P20,000 sa pagpabangag sa pansayan.Dugang pa niini nga nakadawat na siya og tawag gikan sa iyang care taker nga adunay taga CENRO ug Bombo Radyo ang niadto sa maong lugar sa pagtan-aw sa area hinungdan nga mibisita usab kini sa sibyaanan aron sa pagpadayag sa iyang habig.
Giingnan na matud pa niini ang iyang care taker nga ipa-trabaho ang panghaw nga patas-an apan wala kini lihoka. Gihimakak usab sa tag-iya nga duna’y nanggawas nga hugaw sa tao gikan sa septic tank ingon man ang pasangil sa reklamante nga miingon kini’ng “tagai ko ug kwarta para ipa-suyop sa hugaw”
Hinuon nagkanayon si Buhos nga ipatrabaho na niya ang maong panghaw para di na manimaho sa maong lugar. (Lahvi Quiñones)
‘Gi-isyuhan og citation ticket‘
Personal nga giadto ni Brgy. Lahug Councilor Sammy Jeron ang naasoy nga boarding house sa ug naabtan niini ang taga City Environment and Natural Resources Office (CENRO) nga gi isyuhan og citation ticket ang maong paabangan.
Nahinabi na usab sa konsehal ang tag-iya nga si Bujos ug matod pa nga muadto kini sa araea aron masabotan ang solusyon sa maong reklamo. Dugang pa sa konsehal nga wala sila masayod sa maong reklamo gumikan kay wala man kini gipaabot sa barangay sa kasamtangang administrasyon.
Hinoon sa pakighinabi ni Jeron ngadto sa tag-iya nga si Bujos, nisaad kini nga patas-an ang panghaw para di na manimaho ug hugaw sa tao. (LQ)
